Navoiyning "Qizilqum" klubi Superliganing joriy mavsumini yomon boshlamagandi. Biroq, so‘nggi turlarda Nikola Lazarevich shogirdlarining o‘yinlarida biroz pasayish kuzatildi.
9-turda "Qizilqum" futbolchilari Qarshiga safar uyushtirishdi va "Nasaf" jamoasidan oz emas, ko‘p emas, naqd beshta gol qabul qilib olishdi.
5:0 hisobidagi mag‘lubiyat navoiylik rahbarlarga og‘ir botdi shekilli, jamoa bosh murabbiyi - Nikola Lazarevichning kursisini "qimirlatib" qo‘yishdi.
O‘zPFL rahbari Diyor Imomxo‘jayev bugun o‘zining telegramdagi kanalida "Superligadagi ikkinchi iste’fo yaqin. Kimdir oldidan oqayotgan suvning qadriga yetmagandi" deb post qoldirdi.
Bizgacha yetib kelgan ma’lumotlarga qaraganda, "Qizilqum" rahbarlari Nikola Lazarevich o‘z lavozimidan chetlatishadi.
"Qizilqum" ortda qolgan 9 turning 4 tasida g‘alaba qozondi, ikki marta durang o‘ynadi va 3 ta uchrashuvda mag‘lubiyatga uchradi.
Eslatib o‘tamiz, avvalroq Superliganing joriy mavsumdagi birinchi iste’fosi "Bunyodkor" tomonidan qabul qilingandi va Shuhrat Maqsudov egallab turgan lavozimidan ozod qilingandi.
