"Манчестер Юнайтед" бош мураббийи Ральф Рангник жамоанинг ёзги трансфер ойнасидаги режалари ҳақида гапирди.
Шунингдек, немис мутахассиси яқин орада клубнинг янги бош мураббийи Эрик тен Хаг билан потенциал янги футболчиларни муҳокама қилишини айтди.
“Ҳозир мен Эрик тен Хаг билан алоқадаман, биз тез орада учрашамиз ва ёз учун режаларни муҳокама қиламиз. Агар биз тўғри ўйинчиларни, тўғри менталитетга эга ўйинчиларни йиға олсак, клуб тез орада юқори поғонага қайтишига шубҳам йўқ. Балки бунинг учун бир эмас, иккита, балки учта трансфер ойнаси керак бўлар”, - деди Рангник матбуот анжуманида.
Эслатиб ўтамиз, Ральф Рангник келаси мавсумдан бошлаб МЮ маслаҳатчиси лавозимига ўтади. Немис бу лавозимни Австрия терма жамоаси мураббийи фаолияти билан бирлаштиради.
