Италиянинг "Рома" клуби яримҳимоячиси Фернандо Гагонинг агенти Марсело Ломбиянинг таъкидлашича, унинг мижози Мадриднинг "Реал" клуби бош мураббийи Жозе Моуриньо билан яхши муносабатда бўлмагани сабаб мадридликлар сафига қайтиб бормас экан.
"Моуриньо ҳеч қачон Фернандо учун вақт топа олмасди. У шунчаки Гагони ҳурмат қилмасди. Фернандо ўзига нисбатан профессионал муносабатда бўлишларига муносиб футболчи, аммо бунинг ўрнига жуда ёқимсиз жиҳатларга тоқат қилишга мажбур бўлган.
Балким Гагонинг ўз ишига профессионал муносабатда бўлмагани сабабли келишмовчилик келиб чиққан деб ўйлаш мумкин. Аммо бундай нарса бўлмаган, мижозим ҳар доим ўзини жуда яхши тутиб келган. Гаго ўзига нисбатан шундай муносабатда бўлганлари сабабли ҳам "Реал"га қайтишни истамайди.
Биз "Рома" билан доимий шартнома борасида келишиб қўйганмиз. Энди римликлар "Реал" билан келишиб олсалар кифоя", дейди Гагонинг агенти.













