“Андижон” клуби про лиганинг 10-турида ўз майдонида “Зомин”ни қабул қилди ва 2:1 ҳисобида ғалаба қозониб, муҳим уч очкони қўлга киритди.
Учрашувни асосий таркибда бошлаган Ўзбекистон U-20 терма жамоамиз аъзоси - иқтидорли ярим ҳимоячи Шерзод Эсонов “Андижон”нинг ғалабасига ўз голи билан муносиб ҳисса қўшди. Куни кеча у бир қатор саволларга жавоб қайтарди.
- Қийин ўйин бўлишини олдиндан билгандик, - дея гап бошлади, Эсонов. - Чунки “Зомин”да ҳеч қанақа босим йўқ эди. Биз эса ютишимиз шарт эди. Агар очко йўқотганимизда биринчи ўриндаги “Турон” билан очколаримиз фарқи тўрттага кўпайиб кетарди.
- Айтиш керакки, жамоа “Зомин”га қарши қийинчиликка дуч келди. Балки рақибга жиддий қаралмадими?
- Осон клубларнинг ўзи йўқ. Охирги ўриндаги жамоами ёки биринчи ўриндаги клубми, биз доим бир хил тайёрланамиз. Балки “Зомин”ни ноқулай рақиб деб ўйлаймизми, билмадиму, аммо анча қийин бўлди.
- Асосий таркибда майдонга тушганингизда гол уришингизни сезганмидингиз?
- Ҳа, гол ураман деб майдонга тушгандим.
- Ўзбекистон U-20 терма жамоасига чақирилдингиз. Табиийки, йиғинга яхши кайфиятда борасиз, у ердаги мақсадингиз қандай?
- Терма жамоада ҳам “Андижон” шарафини муносиб ҳимоя қилиш ва ўз ўрнимга эга бўлишни истайман. Бу терма жамоа. Шу сабабли Ўзбекистон байроғини баланд кўтаришимиз керак.
- Терма жамоа бош мураббийи Равшан Ҳайдаров у ерда ҳам сизни “Андижон”да ўйнаётган позицияда синаб кўряптими ёки...
- Ҳозирча билмадим. Лекин бундан олдинги йиғинларда ҳужумчилар ортида, ҳужумкор ярим ҳимоячи сифатида синаб кўрди. Менга фарқи йўқ, мураббийлар қаерда синаб кўришса, ўша позицияда қўлимдан келганича ўйнайман.
- Равшан Ҳайдаров сиз билан “Андижон”даги ҳар ўйиндан кейин гаплашиб турадими?
- Ҳа, ҳар ўйиндан сўнг ўзаро гаплашаман. Барча мураббийлар билан алоқаларимиз яхши.
- Футболчи сифатидаги кейинги режаларингиз қандай?
- Режаларимга келсак, “Андижон” билан Суперлигага чиқиш. Бундан кейин ҳам жамоамга кўпроқ ёрдам беришни хоҳлайман. Голларим билан ҳам, ўйиним билан ҳам қўлдан келганича “Андижон”га фойда келтиришга бор кучимни сарфлайман.
