10-19 май кунлари Россия пойтахти Москва мезбонлик қилган «Бутунжаҳон чемпионлар лигаси ва Ғалаба Кубоги»да иштирок этган Ўзбекистон ампутантлар терма жамоаси 5-ўринни эгаллади.
 
8та мамлакат терма жамоалари иштирок этган мусобақада Ўзбекистон терма жамоаси Украина, Туркия ва Абхазия термалари билан бир гуруҳдан жой олди. Ўтказилган 3та ўйинда ўзбекистонлик ампутантлар 1та ғалаба ва 2та дуранг натижага имзо чекиб, гуруҳни 3-ўринда якунлашди.
 
Абхазия Ўзбекистон ва Украина терма жамоаларидан бир хил – 0:12 ҳисобида енгилди. Қолган уч мамлакат – Ўзбекистон, Украина ва Туркия ўзаро 1:1 ҳисобида дуранг ўйнашди. Тўплар нисбатига кўра турк ампутантлари 1-ўринни қўлга киритган бўлишса, Ўзбекистон танга ташлаш лотореяси натижасига кўра 3-ўрин билан кифояланди. Қайд этиш керак, қўшни гуруҳда Россия, Эрон, Франция ва Англия терма жамоалари ўзаро кураш олиб боришганди.
 
Гуруҳ босқичи якунига етгач, 1, 3, 5 ҳамда 7-ўрин учун ўйинлар бўлиб ўтди. Зоналарда дастлабки икки ўринни эгаллаган мамлакатлар ярим финални ҳосил қилган бўлишса, гуруҳдаги 3-4 ўрин эгалари турнирнинг 5-8 ўринлари учун курашиб кўришди. Унда Францияни 11:0 ва Эронни 5:0 ҳисобида маҳф этган Ўзбекистон ампутантлар терма жамоаси 5-ўрин билан кифояланди. Қайд этиш керак, Рустам Қориев бошчилигидаги делегация турнирда бирор марта мағлубиятга учрамаганди.
 
Мезбон Россия мусобақа ғолибига айланган бўлса, кейинги ўринларни Англия, Туркия ва Украина ампутантлари бўлишиб олишди.