Спорт журналистикаси дарғаси, ўзбек шарҳловчилигининг асосчиси Ахбор Имомхўжаев вафот этди.

Ахбор Рустамович Имомхўжаев 1936 йил 19 февраль куни Тошкентда таваллуд топган. Умрини ўзбек спортига бахшида қилган ушбу инсон замонавий ўзбек спорт журналистикасининг асосчиларидан биридир.

Бутун умри давомида оммавий спорт тарғиботи билан машғул бўлган. Футбол соҳасида кўплаб китоблар муаллифи. Фаолияти давомида футбол учрашувларида ҳакамлик қилиб, Республика тоифасидаги ҳакам даражасигача етиб борган. 10 йил давомида Ўзбекистоннинг энг яхши ҳакамлари қаторида бўлган. «Пахтакор» футбол клубида жамоа бошлиғи лавозимида ишлаган. Ўзбекистон телевидениесида спорт таҳририяти шарҳловчиси, бўлим мудири ва бош муҳаррир лавозимларида фаолият кўрсатган.

Унинг қаламига мансуб “Футбол – қувончим, дардим, фахрим”, “Мафтунингман, футбол” ва “Ўзбегимнинг Миржалоли”, ўзбек футболининг 100 йиллигига бағишлаб “Аср футболидаги асл қадрдонларим” каби китоблари футбол мухлисларида катта қизиқиш билан кутиб олинган ва ҳозиргача севиб мутолаа қилинади. Ахбор Имомхўжаев ўзбек спорти ривожига қўшган ҳиссаси учун ҳукуматимиз томонидан «Шуҳрат» медали, “Ўзбекистон Республикасида хизмат кўрсатган ёшлар мураббийи” фахрий унвони билан тақдирланган. Шунингдек, Турон фанлар академиясининг академиги ва Ўзбекистон журналистларининг “Олтин қалам” миллий мукофоти совриндори бўлган.

Ўзбекистон футбол ассоциацияси Ахбор Имомхўжаевнинг вафоти муносабати билан марҳумнинг яқинлари ва оила аъзоларига сабр тилаб қолади. Ўтганларнинг охирати обод бўлсин.