Аргентина терма жамоаси дарвозабони Эмилиано Мартинес Италия терма жамоасига қарши ўйиндан олдинги фикрлари билан ўртоқлашди.
"Финалиссима" ёки қитъа чемпионлари ўйини 1 июн куни Лондонда Тошкент вақти билан соат 23:45да бошланади. Эслатиб ўтамиз, Италия Евро-2020 ғолиби, Аргентина эса Америка Кубоги-2021 соҳиби ҳисобланади.
“Бразилияда бўлиб ўтган Америка кубоги финалида ўйнаш ноёб тажриба бўлди. Англиядаги янги финал ҳам ўзига хос ҳолат. Албатта, рақиб бразилияликлардан кучсиз эмас. Булар охирги Европа чемпионати ғолиблари. Олдинда бизни ажойиб ўйин кутиб турибди. Англияда кўплаб аргентиналиклар яшайди, шунинг учун бу биз учун алоҳида кураш.
Италия терма жамоаси жуда қийин рақиб. У Евро-2020да ажойиб ўйин кўрсатди. Италияликларга Жаҳон чемпионати саралашида омад кулиб боқмади, бироқ улар Қатардаги турнирга йўл олишса, асосий фаворитлардан бири бўлишарди. Ажойиб футболчиларга эга ажойиб жамоа», - деди Мартинес УЕФА расмий сайтига.