"Бавария" ярим ҳимоячиси Серж Гнабри ёзда жамоани тарк этиш ҳақидаги фикрини ўзгартирди, деб хабар қилмоқда журналист Керри Хоу.
Манбанинг хабарига кўра, футболчи кейинги мавсумда ҳам клубда ўйнашни давом эттиришга тайёр. Томонлар ўртасида янги шартнома бўйича музокаралар ҳамон давом этмоқда. Гнабри "Бавария" раҳбариятининг сўнгги таклифини қабул қилмади.
Хабар қилинишича, ярим ҳимоячига "Реал" ва "Ливерпуль" клублари қизиқиш билдиришган.
26 ёшли футболчининг жамоа билан амалдаги шартномаси 2023 йилнинг ёзида якунига етади.
2021/2022 йилги мавсумда у Бундеслиганинг 34 та учрашувида 14 та гол урди ва 5 та голли узатмани амалга оширди.
