"Манчестер Сити" клуби ва Италия терма жамоаси ҳужумчиси 21 ёшли Марио Балотелли ўзи ҳақида ва бўлиб ўтаётган воқеаларга нисбатан қарашлари ҳақида очиқ ва қизиқарли интервью берди.
"Менинг орзуим - вақти келиб кучли футболчи бўлиш. Ҳозир ҳам ўзимни яхши ўйинчи деб биламан, аммо машғулотларда яхши ишласам, тер тўксам бундан ҳам яхшироқ бўла олишимга кўзим етади. Бунинг учун кўп ишлаш керак.
"Олтин тўп?" Ҳа, бу муҳим соврин. Муҳимликда Жаҳон ва Европа чемпионлигидан кейин туради. Бу ҳам менинг мақсадим. Ўйлашимча, бир кун келиб "Олтин тўп"га лойиқ бўламан. Қайтараман, бунинг учун мен кўп тер тўкишим керак.
Ўйлашимча, мен даҳоман, аммо инқилобчи эмасман. Менинг ўз ҳаётим, ўз оламим бор. Мен нимани ҳохласам шуни қиламан ва ҳеч кимга зарарим тегмайди. Ўзимни ақли-ҳуши ўртача бўлган одамдан ақллироқ ҳисоблайман.
Худо менга қобилият берди ва бу жуда яхши, лекин шу ўринда одамлар мени танқид ва муҳокама қилишларига чидаш қийин", - дея Балотеллининг сўзларини келтиради Италия интернет-нашри.
