Эрлинг Ҳоланд «Реал» уни ўз сафига қўшиб олишни истаган бўлса-да, «Манчестер Сити»га ўтишни хоҳлаган.

Мадрид клуби норвегиялик ҳужумчи билан музокара олиб борган. «Қаймоқранглилар» Ҳоландни кўндириш учун бир нечта учрашув ташкил қилган.

«Реал» 21 ёшли ҳужумчини рад этмаган, Эрлингнинг ўзи «Манчестер Сити»га ўтишни маъқул кўрган, деб ёзади журналист Фабрисио Романо.

Ҳоланднинг Ла Лига жамоасига ўтиши келажакда амалга ошиши мумкин, аммо «Реал» икки йилдан кейин норвегиялик шартномасида кўрсатилган товон пулини тўлаб сотиб олиши ҳақида аввалроқ янграган хабарлар нотўғри.

«Манчестер Сити» ҳужумчига ҳозир ва келажакда ҳам ишонч билдирмоқчи, шу боис уни трансферга қўйиш ҳақида гап-сўз бўлиши мумкин эмас.

Аввалроқ «қироллик клуби» президенти Флорентино Перес клуб Эрлинг билан шартнома имзолашни хоҳламаганини айтганди: «‘Реал’да дунёнинг энг яхши ҳужумчиси ўйнайди. Ҳоландни захирада ўтириши учун сотиб олишимиз керакмиди?».

Эрлинг Ҳоланд «Манчестер Сити» билан 2027 йилнинг ёзига қадар мўлжалланган шартнома имзолади. Унга қадар «Боруссия» шарафини ҳимоя қилган ҳужумчи, дортмундликлар сафида 89 та ўйин ўтказиб, 86 гол ва 23 та голли узатмага муаллифлик қилган.