3 июнь куни Ўзбекистон миллий терма жамоаси ўта муҳим учрашувда майдонга тушади. Вакилларимиз ЖЧ-2014 саралаш баҳслари 4-босқичидаги дастлабки ўйинини Эрон термасига қарши ўтказадилар. Ушбу ўйин олдидан терма жамоамиз ташкил этган йиғинга «Локомотив» клубининг ҳам бир йўла 6 нафар (уч нафар футболчи ва уч нафар тиббиёт ходимлари) вакили жалб қилинган. Жумладан, жамоамиз марказий ҳимоячиси Ислом Тўхтахўжаев ҳам мамлакат бош жамоаси йиғинида иштирок этмоқда. Дарвоқе, у Эронга қарши ўйинни ўтказиб юборади, аммо унда 8 июнь куни Ливанга қарши кечадиган ўйинда майдонга тушиш имконияти мавжуд. Биз муҳим ўйинлар олдидан Ислом билан мухтасаргина суҳбат уюштирдик.

— Ислом, ЖЧ-2014 саралаш ўйинларига тайёргарлик қай тарзда кетмоқда? Йигитларнинг кайфияти қандай?
— Терма жамоанинг тайёргарлиги ҳар доимгидек кўтаринки руҳда олиб борилмоқда. Машғулотларда астойдил ишлаяпмиз. Жамоадаги барча йигитларнинг кайфияти аъло.

— Эрон қитъамизнинг етакчи терма жамоаларидан. Боз устига, ушбу ўйинда бир қатор етакчи футболчилар иштирок этишолмайди. Бу ҳол футболчилар руҳиятига таъсир кўрсатмайдими?
— Йўқ, ахир Японияга қарши ўйинда бундан ҳам катта йўқотишлар билан майдонга тушиб, якунда ғалаба қозондик. Терма жамоа ўз номи билан терма, унда энг кучли футболчилар тўп суришади. Шунинг учун 2-3 нафар футболчининг йўқлиги терма жамоа ўйинига таъсир қилмаслиги керак.

— Имкониятларимизни қандай баҳолайсиз?
— Бу босқичда энг кучли жамоалар жамланган. Қолаверса, ҳар қандай ўйин олдидан майдонга тушадиган жамоаларнинг имкониятлари 50х50 деб баҳоланади. Аммо, биз уйда тўп сурамиз ва бу жамоамизга қисман устунлик бериши мумкин.

— Энди «Локомотив» ҳақида ҳам қисқача суҳбатлашсак. Жамоанинг дуранглар исканжасида қолиб кетганини қандай изоҳлайсиз?
— Ҳайронман. Четдан қараганда жамоамиз ёмон ўйнаётгани йўқ. Кўплаб ўйинларда рақибларимизга нисбатан яхшироқ ҳаракат қиляпмиз. Аммо, бизга омад етишмаяптими, вазиятлардан фойдалана олмаяпмиз.

— Жамоа шу тарзда ўйнаб турса, мавсумни қайси ўринда якунлаши мумкин?
— Ҳал қилувчи ўйинларимиз ҳали олдинда. Жамоада яхши футболчилар жамланишган. Мураббийлар штабида ҳам маҳоратли мутахассислар фаолият олиб боришмоқда. «Локомотив»да мавсумни юқори ўринларда якунлаш учун имкониятлар етарли.