"Аякс" ҳужумчиси Себастьян Аллер фаолиятини Германия чемпионатида давом эттириши мумкин. Дортмунднинг "Боруссия" клуби 27 ёшли футболчини сотиб олишга яқин турибди, дея хабар беради инсайдер Фабрицио Романо.
Дортмунд клуби бонусларни ҳисобга олган ҳолда 35 миллион евро таклиф қилди, шунингдек, футболчи билан шахсий шартнома шартларини келишиб олди. Аллер "Боруссия Дортмунд" тарихидаги энг қиммат трансфер бўлади.
Ўтган мавсумда ҳужумчи "Аякс" сафида барча турнирлар доирасидаги 42 ўйинда 34 та гол урди ва 9 та голли узатмани амалга оширди.