Ҳар ерда бўлгани каби Англияда ҳам клублар ўз мураббийларини тез-тез алмаштириб туради. Ҳар бир мутахассис жамоага келиб, ўз услубига мос футболчилар қидира бошлайди. Бу эса янги харидлар амалга ошишига олиб келади. Масалан, "МЮ"да Фергюсоннинг илк хариди Вив Адерсон, Дэвид Мойесники эса Гильермо Варела бўлган. Айни дамда "қизил иблислар"га устозлик қилаётган Эрик тен Хаг эса ҳали ўзининг илк трансферини қилиб улгурганича йўқ. Қуйида топ олтилик жамоаларининг мураббийлари амалга оширган илк харидлар санаб ўтилади.
"Арсенал" – Микель Артета (Пабло Мари)
Мари 2020 йилнинг январь ойида ижара асосида олиб келинади. У дастлаб "Манчестер Сити" нишонида бўлган. Бунга сабаб эса "Фламенго" билан Либертадорлар кубогини қўлга киритгани эди. Пабло Мари кейинчалик 8 миллион фунт эвазига сотиб олинади. У ўтган мавсум бошида Ромелу Лукаку томонидан шарманда қилинганидан сўнг, ортиқ АПЛда кўриниш бермади. Айни дамда эса Мари "Удинезе"да ижара асосида ҳаракат қилмоқда ва "Арсенал"га қайтиш ниятида эмас.
"Челси" – Томас Тухель (Маркус Беттинелли)
Беттинелли "Фулхэм"дан "Челси"га кўчиб ўтади. У шартнома имзолагач, шундай деганди: "Мен бу ерга келганимдан жуда хурсандман ва қўлимдан келганича жамоага ёрдам беришга ҳаракат қиламан". Аммо дарвозабон "Челси"дан фақат биттагина баҳсда майдонга тушди, холос. Тухель ундан бошқа фойдаланмади.
"Ливерпуль" – Юрген Клопп (Марко Груич)
Груич Клоппнинг илк хариди эди. 2016 йилнинг январь ойида Клопп уни 5 миллион фунт эвазига "Звезда" жамоасидан харид қилади. Аммо ярим ҳимоячи "Ливерпуль" сафида атиги 400 дақиқа ўйнади, холос. Кейинчалик Груич ижарага бериб юборилади. Айни дамда эса футболчининг макони "Порту" саналади. Унинг сотувидан "Ливерпуль" 8 миллион фунт ишлаб олган.
"Манчестер Сити" – Гвардиола (Гюндоган)
Гвардиола 2016 йилнинг июнь ойида "BVB"дан 20 миллион фунтга олиб келинган. Бу эса Гвардиоланинг иши эди. Ҳозирда 31 ёшни қарши олган ярим ҳимоячи 4,5 йиллик битим билан "шаҳарликлар" сафини тўлдиради. Гюндоган ҳозирга қадар 157 та ўйинда иштирок этиб, 36 гол уришга эришди. Германия терма жамоаси аъзоси бу ёзда жамоани тарк этиши мумкин.
Эрик тен Хаг – "МЮ" (ҳеч ким)
"Манчестер Юнайтед" яқин кунларда "Барселона"дан Френки де Йонгни, "Аякс"дан эса Антонини олиб келмоқчи. Аммо тен Хаг ҳали бирор харидга қўл урмади.
"Тоттенхэм" – Антонио Конте (Кулусевски)
Конте Кулусевскини "Ювентус"дан қишда олиб келганди. Ярим ҳимоячи 18 ойлик ижара асосида Лондонга ташриф буюрган. Унинг битимида сотиб олиш шарти ҳам мавжуд. Швеция терма жамоаси аъзоси учун АПЛдаги дебют омадли келди. Негаки, у ярим мавсумда 18 та ўйинда майдонга туширилди. 5 та гол ҳамда 8 та ассистга муаллифлик қилди.
ИСМАТОВ Ж.
