"Милан" ҳужумчиси Златан Иброҳимович янги мавсумни олдингидай "11" эмас, ўзи севган "10" рақамдаги футболкада бошлаши мумкин. Бу ҳақда клуб президенти Адриано Галлиани айтиб ўтди.
"Мен Иброҳимовичга "10" рақамли футболкани ваъда қилдим. Бу рақам Зеедорфга тегишли, мен у билан ҳам гаплашдим. Агар у бу рақамли футболкани бошқа киймаса, уни Златанга берамиз. Златан бу рақамни "Барселона"дан бизга ўтган чоғидаёқ сўраган эди. У пайтда бунинг иложи йўқ эди", - дея Галлианининг сўзларини келтиради "Милан" расмий сайти.
Зеедорфнинг клуб билан шартномаси 2012 йилнинг 3 июнида ниҳоясига етади, шартномани узайтириш ҳақида томонлар ҳали келишмаганлар.
