Кеча Саудия Арабистони чемпионатида сўнгги тур ўйинлари бўлиб ўтди. "Ан-Насср" клуби ўз майдонида "Ал-Фат"ни қабул қилиб, жуда қийин ғалабани қўлга киритди.

Баҳснинг 13-дақиқасида мезбонлар Мартинеснинг голи эвазига ҳисобни очишган бўлса, тайм тугашига 8 дақиқа қолганида меҳмонлар мувозанатни тиклашди.

Учрашувнинг 68-дақиқасида "Ан-Насср" пенальти тепиш ҳуқуқини қўлга киритди, аммо Талиска уни голга айлантира олмади. Орадан 15 дақиқа ўтиб эса Талисканинг ўзи майдондан четлатилди.

Ўйин қўшиб берилган 5-дақиқада эса майдон эгалари пенальти тепиш ҳуқуқини қўлга киритишди. Жалолиддин Машарипов "паненка" услубида гол уриб, жамоасига ғалаба келтирди. Ҳамюртимиз Саудия Арабистони чемпионатининг жорий мавсумида 26та ўйинда иштирок этиб, 2 гол ва 5 ассист муаллифига айланди. У кечаги учрашувнинг бошидан охиригача майдонда ҳаракат қилди.

"Ан-Насср" мавсумни 3-поғонада якунлади. "Ал-Ҳилол" эса кечаги ғалаба эвазига чемпионликни қўлга киритди. Сўнгги турда дуранг ўйнаган "Ал-Иттиҳод" эса финиш чизиғида чемпионликни бой бериб қўйди.