«Манчестер Юнайтед» ҳужумчиси Криштиану Роналду футболчини зўравонликда айблаган собиқ модель Кетрин Майорганинг адвокатидан 626 минг доллардан ортиқ пул ундирмоқчи.

Associated Press нашрининг хабар беришича, футболчининг адвокати Питер Кристиансен АҚШ округ судига даъво аризаси билан мурожаат қилиб, Майорганинг адвокати Лесли Марк Стоваллдан суд харажатлари 626 минг доллардан ортиқ миқдордаги пул ундиришни сўрамоқда.

10 июнь куни судья Женнифер Дорси Стоваллни «виждонига қарши ҳаракати», «ўғирланган» махфий ҳужжатлардан фойдаланган ноҳақ хатти-ҳаракати сабаб, жазолаш ҳақида қарор чиқарди. Судья Майорганинг адвокатини «ахлоқий хулқ-атвор чегарасини кесиб ўтган ва суд қоидаларини менсимаган», деб топди.

42 саҳифалик қарорда Дорси Майорганинг даъвосини рад этди ва бу масала бўйича яна судга мурожаат қилишни тақиқлаш ҳақида қарор чиқарди. Шунингдек, Стоваллнинг хатти-ҳаракати Роналдуга зарар етказганлигига аниқлик киритилди.

«Стоваллнинг қўпол ва даҳшатли қилмишлари туфайли Роналду ўзини ҳимоя қилишга мажбур бўлди ва бунинг учун у шахсан жавобгар бўлиши керак», — дейди португалиялик футболчининг адвокати ўз баёнотида.

Роналду ва Майорга ўртасидаги ушбу машмашалар 2018 йил сентябрь ойида бошланган эди. Аёл 2009 йили Лас-Вегасда футболчи томонидан зўравонликка учрагани ҳақида маълум қилганди. Модель 2010 йилда Роналду вакиллари билан келишувга эришган ва 375 минг доллар эвазига ушбу маълумотларни ҳеч кимга ошкор қилмаслик бўйича шартнома имзолаган. Кейинчалик португалиялик пул ўтказганини тан олган. 2020 йил октябрь ойида модель яна бир бор Роналду билан судлашишга ҳаракат қилди. У 2010 йилда тузилган ошкор этмаслик тўғрисидаги шартнома шартларини қабул қилаётганда руҳий ҳолати одатий бўлмаганини исботлашга уринди.