ФИФА бугун терма жамоаларнинг июнь ойи рейтинг жадвалини эълон қилди. Ўзбекистон миллий терма жамоаси 3 июнь куни Эронга ютқазиб қўйганига қарамай, аввалги рейтингга нисбатан 4 поғона юқорилади ва 66-ўринга жойлашди.

Терма жамоамиз ҳисобидаги очколар сони 500дан ошди — ўтган ойда 494та эди, 503та бўлди. Хитой эса 7 поғона пастга шўнғигани учун Ўзбекистон яна Осиёнинг бешинчи жамоасига айланиб олди.

Ўз навбатида, Ўзбекистон устидан Тошкентда ғалаба қозониб қайтган Эрон 7  поғона кўтарилиб, 45-ўринга чиқиб олди. ЖЧ саралашидаги гуруҳдошимиз Қатар Ливанни мағлуб этишига қарамай, ФИФАнинг янги рейтингида 7та ўрин пастлади (91-ўрин). Мағлубият эса Ливанни 14 поғона пастга "улоқтириб" юборди — 143-ўрин.

Жанубий Корея саралаш босқичининг 1-турида расмий ўйинда иштирок этмади. Кореяликлар фақат ўртоқлик учрашуви билан чекланишди. Испания билан ўйиндаги мағлубиятдан сўнг гуруҳдошларимиз 35-ўринга тушишди (4 поғона пасайиш).

Япония миллий терма жамоаси бирданига 7та поғона кўтарилиб олишгани туфайли, улар Австралиядан ўтиб кетишди ва Осиёнинг 1-рақамли терма жамоасига айланиб олишди. "Кенгерулар" эса 3та ўрин пастлашди ва 24-ўринни эгаллаб туришибди.

Рейтинг жадвалининг юқори қисмини Испания ҳали-бери ҳеч кимга топширмаса керак. Иккинчи ўринга эса Уругвай кўтарилиб олди. Жанубий америкаликлар Германиядан 4 очкога илгарилаб кетишди. 4-ўрин Голландияга тегишли бўлиб турган бўлса, Бразалия 5-поғонага чиқиб олди.

Июнь ойи рейтингининг тўлиқ кўриниши билан ФИФА сайтида танишиб олишингиз мумкин.