Европа истеъмолчилари ассоциацияси расмий сайтининг хабар беришича, Европа чемпионати иштирокчи терма жамоалари формасида инсон ҳаёти учун хавфли ва зарарли бўлган моддалар мавжуд.
Испания ва Италия футболкаларида қўрғошиннинг меъёрдан ортиқ улуши ва эндокрин тизимига таъсир қилувчи нонилфенол моддаси бор. Португалия ва Голландия формаларида никель борлиги аниқланган. Польша терма жамоасининг футболкаларини эса зудлик билан савдодан олиб ташланиши маслаҳат берилган, унда асаб тизими учун хавфли бўлган қалай бирлашмалари бор экан.
"Ишқибозлар 90 евро эвазига севимли жамоалари футболкаларини сотиб олишади. Улар сифатли ва хавфсиз молларни сотиб олишлари керак. Амалда бундай бўлмаяпти. Оғир металлар қандай қилиб оммавий истеъмолчиларнинг қўлига тушиб қоляпти, тушунарсиз.
Бизнинг тестларимиз шуни кўрсатдики, бу моллар хавфли, аммо қонунчилик уларни савдодан олиб ташлашга тўсқинлик қилади. Биз бунга қарши курашни кучайтирамиз", - дейилади ташкилот баённомасида.
