Ҳужумчи Тома Лемар ёзда "Атлетико Мадрид"ни тарк этишни истамаяпти. 26 ёшли француз 2018 йилдан буён “матрасчилар” сафида ўйнаб келмоқда.
“Тома шартномани узайтирмоқчи. "Атлетико" бизга ўтган йилнинг охирида биринчи таклифни билдирганди, январда биз бошқачароқ таклиф билан жавоб қайтардик. Ўшандан бери бизда раҳбариятдан бошқа янгилик йўқ", - деди футболчининг агенти Артур Поупел L'Equipe нашрига берган интервюсида.
Лемарнинг "Атлетико" билан амалдаги шартномаси 2023 йилгача мўлжалланган. Transfermarkt портали футболчининг нархини 40 миллион еврога баҳоламоқда.
Ўтган мавсумда Лемар барча турнирларда 34 та ўйинда майдонга тушиб, 4 та гол урди ва 6 та голли узатмани амалга оширди.
