Хабарингиз бор, "Нефтчи" биринчи давра якунланганидан сўнг, иккинчи даврага тайёргарлик кўриш мақсадида пойтахтимизда ўқув-йиғин машғулотларини олиб бормоқда.
Жамоа давралар оралиғида ҳар томонлама пухта тайёргарлик кўришни ўз олдига мақсад қилиб қўйган. Виталий Левченко бошчилигидаги мураббийлар штаби ёзги давралар оралиғида режа асосида йиғин олиб бормоқда.
Пойтахтимиздаги ўқув-машғулот йиғини 24 июлгача ўтказилиши кўзда тутилган. Мазкур йиғин давомида фарғоналиклар 4та назорат-синов баҳси ўтказишни режалаштирган. Мазкур ўртоқлик ўйинлари 13, 17, 21 ва 25 июл кунлари ўтказилади, жумладан 13 июл куни Пролига вакили "Янгиер-Қурувчи" клубига қарши майдонга тушишади.
Таркибдаги ўзгаришлар ҳам жамоа муҳлисларини қизиқтириши турган гап, жамоага хозирги кунда "Олимпик" клубида тўп суриб келган ёш ҳимоячилар Сардорбек Маҳмудов ва ярим ҳимоячи Хумоюн Шербўтаевлар машғулотларида кўриниш берди, бундан ташқари ҳужумчиси Шаҳзод Убайдуллаев ҳам кичик жароҳатдан сўнг сафга қайтган. Ўқув йиғин машғулотлар давом этмоқда.
