Беларус пойтахти Минск шаҳрида ўқув-йиғин машғулотларини ўтказаётган "Бунёдкор" бугун илк синов-назорат ўйинида майдонга тушади.
Рақиб барчамизга таниш, Беларус чемпионати пешқадамларидан бири – "Энергетик БГУ" жамоаси. Маълумки, Павел Роднёнок мураббийлигидаги рақиб сафида тўрт нафар ўзбекистонлик тўп суради. Булар - Шоҳруҳ Абдураҳмонов, Бобур Абдухолиқов, Абдуқодир Хусанов ва Аббос Жумақулов. Аҳамиятлиси, Абдуқодир Хусанов билан Аббос Жумақуловнинг Ўзбекистондаги сўнгги жамоаси "Бунёдкор". Хусанов "қалдирғочлар" тарбияланувчиси эканлигини эътироф этиш жоиз.
"Энергетик БГУ" мавсумни кўтаринки руҳда ўтказмоқда. Ортда қолган 14 та турнинг 8 тасида ғалаба қозониб, 2 та баҳсда дуранг ўйнаган Павел Петрович шогирдлари 28 та очко билан турнир жадвалида 2-ўринни эгаллаб турибди. Жамоа ҳужумчиси ўзбекистонлик Бобур Абдухолиқов эса, нафақат "Энергетик БГУ"ни, балки чемпионатнинг ҳам тўпурари ҳисобланади. Унинг ҳисобида 14 та гол бор.
1995 йил ташкил топган "Энергетик БГУ" Беларус олий лигасида 2019 йилга келиб "пайдо" бўлди. Узоқ йиллар қуйи лигаларда иштирок этган жамоа олий лигадаги илк мавсумини 12-ўринда якунлади. 2020 йилги мавсум эса жамоа икки поғона юқорилади – 10-ўрин. Аммо бугунги рақибимиз учун 2021 йилги мавсум омадсиз келди. "Энергетик БГУ" финишга 13-ўринда етиб келди. Лекин таъкидлаганимиздек, Павел Роднёнок жамоаси 2022 йилги мавсумни ажойиб руҳда ўтказмоқда.
Бугунги баҳс "Минск" спорт мажмуасида ўтказилади. Ўйин маҳаллий вақт билан 15:00 да (Тошкент вақти билан 17:00) старт олади. Учрашув "Bunyodkor TV" орқали тўғридан-тўғри эфирда намойиш этилиши режалаштирилган.
