"Манчестер Юнайтед" бош мураббийи Эрик тен Хаг ярим ҳимоячи Кристиан Эриксеннинг трансфери жамоага қандай таъсир қилишини айтди.

“Эриксен - тажрибали футболчи. У Италияда, Нидерландияда, Англияда узоқ вақт ўйнаган, шунинг учун у Премьер-лигани билади. Шундай экан, унинг жамоада эканлиги бизга катта устунлик беради.

Менимча, у ажойиб футболчи ва мухлислар унинг ўйинини қадрлашади, чунки у жуда ижодкор, ғоялари бор. Ўйлайманки, бизнинг ҳужумчиларимиз хурсанд бўлишади, Эриксен уларни ўйинга жалб қилади", - деди Тен Хаг "қизил иблислар" матбуот хизматига.

Манкунианликлар 30 ёшли футболчининг трансфери ҳақида 15 июль куни эълон қилишди. Даниялик футболчи билан 2025 йилгача мўлжалланган шартнома имзоланган.

Эриксен ўтган мавсумда "Брентфорд" сафида ўйнаб, 11 та ўйинда 1 та гол ва 4 та голли узатмани амалга оширди.