Мюнхеннинг “Бавария” клуби ярим ҳимоячиси Леон Горецка жарроҳлик амалиётидан сўнг ўзини қандай ҳис қилаётгани ҳақида фикр билдирди.
“Менга катта куч бағишлаган тикланиш ҳақидаги хабарларингиз учун ташаккур. Кечаги операция муваффақиятли ўтди, ўзимни яхши ҳис қиляпман. Мен имкон қадар тезроқ майдонга қайтиш учун бор кучимни ишга соламан ва кўп вақтимни ўтказиб юбормаслигимга ишончим комил”, - деб ёзади Горецка ўзининг ижтимоий тармоғида.
Олдинроқ 27 ёшли ярим ҳимоячи 6-8 ҳафтани ўтказиб юбориши хабар қилинганди.
"Бавария" 2022/2023 йилги мавсумдаги илк расмий ўйинини 30 июль куни "Лейпциг"га қарши ўтказади. Жамоалар Германия Суперкубоги учун кураш олиб боради.
