Хосеп Гвардиола 6 мавсумдан буён «Манчестер Сити» қудратига қудрат қўшмоқда, клубни ҳам таркиб, ҳам тактик ишланмалар нуқтаи назаридан тобора кучайтирмоқда. Бироқ ҳамон ЧЛнинг «шалпангқулоқ» кубогини қайта бўйсиндиролмаяпти. Испаниялик мутахассис «Барселона» билан еврочўққига кўтарилганидан сўнг «Бавария»да ҳам бу турнирни забт этолмаганди. Шунга қарамай, уни замонавий футболнинг энг билимдон мураббийларидан бири сифатида тилга олишади. Чунки Пеп миллий лигаларнинг чинакам қироли!
Диққат қилинг, профессионал даражадаги катта мураббийлик йўлига 2008|2009 йиллар мавсумида қадам ташлаган Хосеп Гвардиола шундан буён миллий лигаларда нақ 10 марта чемпионлик рутбасига эришди. 13 мавсум учун 10та олтин медаль - шунчаки, қойилмақом статистика! Бунақасини ўйлаш ҳам қийин, очиғи. Қолаверса, «олтин»сиз якунланган 3та мавсумда ҳам Гвардиола жамоалари миллий лигада 3-ўриндан пастга тушган эмас. Буниси энди фантастикадан ҳам кўпроқ... Хуллас, Хосеп Гвардиоланинг 13 мавсуми ҳосиласи - 10та чемпионлик, 2та «кумуш» ва 1та «бронза».
* Хосеп Гвардиола фаолиятида 2 марта чемпионлик масаласида 3та мавсумга чўзилган серия қайд этди. У аввалига «Барселона»ни, кейин «Бавария»ни қаторасига 3 мартадан олтин марра сари етаклади.
* Испаниялик мутахассиснинг «Манчестер Сити»даги 6 йиллик фаолиятига алоҳида тўхталсак, у АПЛдек катта рақобат майдонида чемпионлик мақомини 2 марта ҳимоя қилишга эришди.
* Мавсум-2016|2017да АПЛнинг бронза медали бу Хосеп Гвардиола учун ҳозирча миллий чемпионатлардаги энг паст натижа бўлиб турибди.
«МАНЧЕСТЕР СИТИ» МУТЛАҚ ҲУКМРОН
Одатий тасаввур бўйича айтсак, «Манчестер Сити» АПЛда шайхлар томонидан ажратилаётган беҳисоб капитал эвазига ҳукмронлик қилаётгандек. Ҳа, бу тасаввур хато эмас - «шаҳарликлар»нинг зафарли юришларида пул кучининг таъсири катта, албатта. Шунинг баробарида алоҳида таъкидлаш керак, шайхлар клуб академиясига ҳам бефарқ эмаслар. Охирги мавсум натижаларига қарасак, араблар томонидан болалар-ўсмирлар футболига тикилган маблағ ўз мевасини бера бошлади. Ҳар ҳолда, «Манчестер Сити» тизимидаги 5та жамоа мавсумни чемпион мақомида якунлади. Гап асосий жамоадан ташқари, U-16, U-17 ва U-18 тоифалари, шунингдек, Иккинчи лигада ўйнайдиган ўринбосарлар таркиби ҳақида кетмоқда.
