Аргентина терма жамоаси ҳужумчиси Лионель Месси Бразилия термасига қарши ўртоқлик учрашувида жамоаси кўрсатган ўйиндан мамнун эканини билдирди, дея хабар беради Аргентина матбуоти.
Ўз майдонларида тўп сурган ҳолда, "альбиселесте" 4:3 ҳисобида ғалаба қозонди. Мессининг ўзи бўлса хет-трик қайд этди.
"Бу мен учун ажойиб ва эсда қоларли кун бўлди, аҳир мен Бразилия дарвозасига учта тўп йўлладим. Айтиш жоизки, ҳеч қачон бошқаларнинг бўлмағур гаплари билан бошимни қотирмайман. Ҳар доим терма жамоам сафида энг яхши ўйинимни кўрсатишга интилиб келганман. Жамоадошларимнинг менга нисбатан илиқ муносабатлари менда фахр ҳиссини уйғотмоқда. Жаҳон чемпионатига бошланиши учун ҳали анча вақт бор, агарда шу тарзда ўйин кўрсатсак 2014 йилги Бразилия майдонларидаги мусобақага йўлланмани қўлга киритамиз. Мен жаҳон чемпиони бўлишни истайман, аммо биз ҳозирча бу орзудан анча йироқдамиз", — дейди Месси.
Бундан ташқари, аргентиналик ҳужумчи бразилиялик касбдоши Неймарга навбатдаги марта уни энг яхши футболчи деб атагани учун миннатдорчилик билдирди: "Неймар – жуда яхши ва катта футболчи. Унинг сўзлари учун алоҳида рахмат айтмоқчиман."