Бугундан бошлаб Тошкентда футбол жонкуяри Жўра Хонназаров хотирасига бағишлаб 1999 йилда туғилган футболчилар ўртасида хотира турнирига старт берилди. Бизга маълум бўлишича, ушбу мусобақада жами 22та жамоа 6 гуруҳга бўлинган ҳолда кураш олиб бормоқда. Отажон Авезов бошчилигидаги футбол мактабимизнинг тарбияланувчилари «D» гуруҳида «Пахтакор» ва «Нефтчи» ёшлари билан жой олишди.
Бугун «Машъал-99» ўзининг дастлабки беллашувини Чилонзордаги сунъий майдонда «Пахтакор» тарбияланувчиларига қарши ўтказиб, 2:2 ҳисобини қайд этди. Шуни айтиш лозим, ёш «машъалчилар» 0:2 ҳисобида имкониятни бой бераётиб, якунда дуранг натижага эришишди. Мазкур баҳсда Ботиров Шаҳбоз ва Ҳамидов Ойбек томонидан киритилган голлар «Машъал-99»га бир очкони тақдим этди. Энди эртага футболчиларимиз «Нефтчи»га қарши майдонга тушишади. Шуни айтиб ўтиш керак, бу гуруҳдан фақат бир жамоа кейинги босқичга чиқади.
Хотира турнири. 1-тур
«МАШЪАЛ-99» - «ПАХТАКОР» - 2:2
Ўйиндан сўнг «Машъал-99» бош мураббийи Отажон Авезов қуйидаги фикрларни билдириб ўтди:
- «Пахтакор»га қарши баҳсда нафақат дуранг, балки ғалаба қозонишимиз ҳам мумкин эди. Бироқ шогирдларим бир нечта хавфли вазиятлардан фойдалана олишмади. Ўтказиб юборилган голларда эса дарвозабон хатога йўл қўйди. Биринчи голда дарвозабонимиз жой танлашда адашди, иккинчи голда эса тўпга чиқишда хатога йўл қўйди. Бунинг устига ҳисобни тенглаштирганимиздан кейин битта ўйинчимиз қизил карточка олиб майдонни эрта тарк этди. Эртага навбатдаги баҳсни «Нефтчи»га қарши ўтказамиз. Шу ўйинда рақибни йирик ҳисобда енгишга ҳаракат қиламиз.
