Тито Виланова вакили Жозеп Мариа Оробитг мижози билан клуб раҳбарияти ўртасидаги келишувни якунига етказди. “Барселона”нинг янги бош мураббийи клуб билан икки йиллик шартномага имзо чекадиган бўлди.
“Барселона” спорт директори Андони Субисаррета билан уч соатлик музокара олиб боргач, Оробитг Виланованинг келажагига ойдинлик киритиб олди. Шартноманинг ҳар бир банди муҳокама қилинди. Фақат томонларнинг имзо чекиши қолди, холос. Маълум бўлишича, қоғозларни имзолаш жума кунга белгиланган. Шартномани расмийлаштиришнинг кечиктирилиши Тито Виланованинг ҳозирда таътилда экани ва Сандро Роселнинг Миланда хизмат сафаридалиги билан боғлиқ.
Оробитг ва Субисаррета учрашуви чоғида “Барселона” мураббийлар штабига кирувчи мутахассислар тақдирига ҳам ойдинлик киритилди. Энди Виланованинг ассистенти лавозимида Жорди Роура иш олиб борса, жисмоний тайёргарлик бўйича жавобгар Аурели Альтмира жойида қолдирилиши белгилаб олинди.
