УЕФА 12 июнь куни Россия термаси билан ўйинда мушак ёққан ишқибозларнинг номақбул ҳатти харакатлари учун Польша футбол федерациясига нисбатан тартиб-интизом ишини очди.
Шунингдек, УЕФА Россия футбол иттифоқига ҳам тартиб-интизомга тегишли суриштирув ишларини бошлади. Поляклар билан ўйинда россиялик ишқибозлар майдонга мушаклар улоқтиришган ва бемаъни сўзлар ёзилган банерлар кўтаришган. Бундан ташқари россиялик бир ишқибоз майдонга югуриб чиққан.
Таъкидлаш жоиз, бу ҳаракатлар учун чиқариладиган қарорларнинг россиялик ишқибозларнинг биринчи турда Вроцлавдаги ўйинда қилган номаъқулчиликлари учун қўлланилган санкцияларга алоқаси йўқ. Аввалги сафар УЕФА тартиб-интизом қўмитаси Россия терма жамоасининг келгуси Европа чемпионати саралаш учрашувларидан олти очко олиб ташлаш ҳақида қарор чиқарган эди. Аммо бу қарор шартли равишда қўйилган.
Тартиб-интизом қўмитаси бу иккала ишни 17 июнь куни бўлиб ўтадиган мажлисда кўриб чиқади, дея хабар беради УЕФА расмий сайти.
