Қозоғистонлик легионер Эмиль Кенжисариев “Бунёдкор”ни тарк этди.

Мавсум бошида жамоамиз устозлари Эмиль Кенжисариевдан кўп нарсалар кутишган эди. Бироқ унга асосий таркибдан муқим ўрин эгаллаш насиб этмади.

Эмиль Кенжисариев “Бунёдкор” таркибида олий лига ва Чемпионлар лигаси баҳсларида олтитадан учрашув ўтказди. Эътиборлиси, Эмиль учрашувларни уч маротабадан асосий таркибда бошлаган бўлса, яна шунча захирадан майдонга тушган.

Мунтазам ўйин амалиётига эга бўлмай қолаётган футболчи “Бунёдкор” ФК раҳбариятига мурожаат этиб, амалдаги шартномани ўзаро келишган ҳолда бекор қилиш ташаббуси билан чиқди.

- Бу масала мураббийлар кенгашида муҳокама қилинди. Бош мураббий Миржалол Қосимов ҳеч бир футболчига ҳатто у легионер бўлган тақдирда ҳам асосий таркибда жой кафаолатланмаганлигини айтиб ўтди. Бу вазиятда мураббий футболчини ҳолатини тушуниб, Кенжисариев таклифини қўллаб-қувватлади. Энди Эмиль Кенжисариев ўз фаолиятини “Бунёдкор”га келишдан олдиган ўйнаган “Актобе” клубида давом эттиради. “Бунёдкор” эса унинг бўшаб қолган ўрнига жамоани кучайтира оладиган ва Чемпионлар лигасида фойдаси тегадиган бошқа хорижлик футболчи қидиради, - дейди “Бунёдкор” ФК Биринчи вице-президенти ва Бош директори Баҳромжон Давлатов.

Клуб раҳбарияти футболчи таклифини кўриб чиқди ва ўзаро дўстона ҳайрлашишди. Томонлар бир-бирларига келгуси фаолият мобайнида омадлар тилашди.