Давралар оралиғида Миржалол Қосимов бошчилигидаги АГМК жамоаси ўз сафига янги футболчиларни қўшиб олишда давом этмоқда.

"Жамоамиз ёзги трансфер ойнасидаги охирги келишувга эришди.

Эркин агент мақомидаги тажрибали футболчи, Грузия футболи юлдузларидан бири — Гиорги Папава таянч ярим ҳимоячи саналади.

АГМК футбол клуби «Динамо» Тбилиси жамоасининг кўп йиллик сардори — Гиорги Папава билан ярим йиллик шартнома имзолади.

Фаолиятини «Динамо» Тбилисида бошлаган, кейинчалик Кипрнинг «Неа Саламина» жамоасида ўйнаган ва Грузияда «Дила Гори» ҳамда «Рустави» клубларида ҳам тўп тепган Папава охирги 4 мавсумни «Динамо» Тбилисида жамоа сардори сифатида ўтказди ва 4 маротаба Грузия чемпионлигига эришиб, 3 бор мамлакат кубогини қўлга киритган. Гиорги Папава Чемпионлар лигаси, Европа лигаси ва Конференциялар лигасида майдонга тушган.

Папава фаолияти давомида 267 ўйин ўтказган ва рақиблари дарвозасига 7 маротаба гол урган.

Умид қиламизки, Гиорги АГМК билан ҳам Ўзбекистон Суперлигасида чемпионликни қўлга киритади.

АГМК аҳил оиласига хуш келибсан, Гиорги!" - дейилади АГМК расмий баёнотида.