Франция терма жамоаси бош мураббийи Лоран Блан Евро-2012 "D" гуруҳи 2-тури доирасида Украина терма жамоаси устидан қозонилган ғалаба (2:0) ни изоҳлар экан, "учранглилар" рақибидан яхшироқ ўйнаганини таъкидлаб ўтди.
"Донецкда рўй берган ноқулай об-ҳаво шароитлари ўйинни мураккаблаштирди ва бир соатдан сўнг қайта бошлашга мажбур бўлдик. Биз ҳақиқатдан ҳам ўйинни бугун якунламоқчи эдик, шу сабабли ёмғир шашти сусайгач, майдонга чиқишимиз ва ўйнашимиз шарт эди.
Бу ўйин мана шундай об-ҳавода ҳам Европа чемпионатида ўз ўйинимизни намойиш эта олишимизни кўрсатиб берди. Биз ғалаба қозонишни уддаладик, бу эса жуда муҳим.
Майдон ҳолати оптимал эмасди, лекин Англияга қарши ўтган ўйиндан яхшироқ ўйин намойиш қилишга қурбимиз етди. Биз аввалдан рақиб ўйинини кўп таҳлил қилган эдик, уларнинг Швецияга қарши ўйинини кўп марта қайтариб томоша қилдик.
Биринчи голдан сўнг биз янада фаол ва тажовузкор ўйин кўрсатишга ҳаракат қилдик. Украина терма жамоаси ҳам ҳаракат қилди, бироқ биз яхшироқ ўйнадик", - дея Лоран Блан сўзларини келтирмоқда Чемпионат.com
