Польша терма жамоаси устидан "А" гуруҳининг сўнгги турида 1:0 ҳисобида ғалаба қозонган Чехия терма жамоаси бош мураббийи Михал Билек ўз жамоасининг иккинчи бўлимдаги ўйинига юқори баҳо берди.
— Албатта, ҳаммамиз жуда мамнунмиз. Мусобақа мезбони устидан ғалаба қозониш – жуда катта натижа, — дея таъкидлади Билек. — Иккинчи ва учинчи ўйинларда менинг жамоам фантастик ҳаракат қилди. Бугунги рақбимиз учрашув фаворити эди. Бироқ мезбонларнинг бошланғич босимдан сўнг ўзимизга кела олдик ва ўйиннинг иккинчи бўлими тўлиқ бизнинг ташаббусимиз остида ўтди. Танаффусдан сўнг майдонга хотиржам чиқдик. Ўз имкониятимизни кутдик ва ундан фойдалана олдик, сўнгра ишонч билан ўйиннинг боришини назорат қилдик. Рпусларга қарши кечган биринчи ўйиндан кейин сочилиб кетмасдан, ўзимизни йиға олганимиздан жуда хурсандман, гарчи бу ҳол жуда қийинчилик билан амалга ошган бўлса ҳам. Барча қийинчиликларга қарамасдан, сабот билан меҳнат қилишда давом этдик ва пировард натижада — мусобақадаги иштирокимизни давом эттирмоқдамиз.
— Танаффусдан сўнг майдонга чиқаётиб, Россия ҳисобни тенглаштириши ва сизларни яна дуранг қониқтириши мумкинлигини тахмин қилдингизми?
— Руслар гол уролмаганидан жуда ҳайратдаман. Ахир улар катта мақсадлар билан келишган эди, тўсатдан ортга қайтишмоқда. Бу жуда катта сюрприз. Танаффусдан кейин мана шундай натижалар бўлишини ким тахмин қилибди дейсиз? Греклар ўз кучини кўрсата олибди. Улар Польшага қарши ўйинда ҳам жуда яхши ҳаракат қилишган эди. Ана шундай жамоани енгиш бизга нақадар оғир бўлганини энди тушунгандирсиз?
