Бугун Ўзбекистон футбол ассоциациясида ФИФА координаторлари Андрей Вашкевич ва Лоренцо Фофи билан учрашув бўлиб ўтди.

Учрашув давомида томонлар ўзбек футболини ривожлантириш билан боғлиқ бир қатор масалаларни муҳокама қилишди. Хусусан, терма жамоалар учун яратилган шарт шароитлар, бўлажак мусобақалар ва олдиндаги режалар ҳақида фикр алмашилди.

“Ўзбекистон ёш иқтидорли футболчиларга жуда бой, улар учун ўз маҳоратини рўёбга чиқариш борасида замонавий футбол инфратузилмаси зарур. Биз футболчиларни тизимли равишда миллий терма жамоаларга тайёрлаш учун эркаклар, аёллар, футзал, соҳил футболи жамоалари сонини 19 тага етказдик. Агар илгари ёш терма жамоалар чет эллик тенгдошлари билан ўртоқлик ўйинларида жуда кам иштирок этишган бўлса, энди улар доимий равишда халқаро турнирларда қатнашиш имкониятига эга бўлишмоқда ва бу уларга халқаро тажриба тўплашга имкон яратяпти” деди Равшан Ирматов.

Суҳбат давомида Ўзбекистон терма жамоалари учун қурилаётган “Дўстлик” базасининг қурилиш-реконструкция жараёни, марказдан ўрин олган обектлар, жумладан, машғулот майдончаси ва стадион лойиҳасининг техник-ташклий жараёнлари борасида фикр алмашилди. Ушбу лойиҳаларга оид асосий режалар муҳокама қилиниб, обектда 2 та гибрид ва 2 та сунъий қопламали футбол майдонлари барпо қилиниши бўйича фикр алмашилди.

ФИФА вакиллари амалга оширилган ишларни юқори баҳолаб, режаларни янада такомиллаштириш бўйича ўз таклифлари билан ўртоқлашдилар.