Европа футболига расман старт берилди. Англия премьер лигаси учрашувлари ўтган ҳафтада бошланган эди. Аммо ҳали трансфер ойнаси якунланишига ярим ой вақт бор. Одатда энди катта трансферлар амалга оширилади. Ҳўш сўнгги кунларда Европа футболида қандай сотувлар амалга ошмоқда? Қуйидаги мақола шу ҳақида бўлади.
"МЮ" мухлисларнинг ғазаби туфайли Арнаутович трансферини рад этди
"Манчестер Юнайтед" трансфер ойнаси якунида ҳужум чизиғини "Болонья"нинг 33 ёшли ҳужумчиси Марко Арнаутович билан кучайтиришга қарор қилди. Манкунианликлар австриялик футболчига қизиқиш билдираётгани ҳақида бир қатор манбалар хабар берган. Арнаутовичнинг потенциал трансфери ҳақидаги хабарни "Манчестер Юнайтед" мухлислари кескин салбий муносабат билан кутиб олишди.
"Арнаутович - бу А, Б ёки C режаси эмас. Бу тамом бўлиш режаси", - деб ёзган мухлислардан бири. "Адрьен Рабьо ва Арнаутович булар жамоага келиши ақлга сиғмайди: биз ўртамеёна жамоага айланмаганмиз", дея қўшимча қилди яна бири.
Якунда мухлислар фикри инобатга олинди. TheAthletic журналисти Лори Уитвелл хабарига кўра, "Манчестер Юнайтед" Арнаутовични қўллаб-қувватловчиларнинг салбий муносабати ва “Болонья” томонидан талаб қилинган товон пулининг ҳаддан ташқари кўплиги туфайли сотиб олмасликка қарор қилган.
Аммо "Олд Траффорд" мухлислари ҳам клубда кўришни истамайдиган яна бир янги футболчи, "Ювентус" ярим ҳимоячиси Адрьен Рабьонинг Эрик тен Хаг жамоасига қўшилиш эҳтимоли юқори. “Манчестер Юнайтед” “Ювентус” билан шартномаси бир йилдан кейин тугайдиган 27 ёшли франциялик футболчини тахминий 20 миллион еврога сотиб олиши кутилмоқда.
Гедеш "Вулверхэмптон"га ўтди.
Лондоннинг "Арсенал" жамоаси қизиқиши доирасига тушган "Валенсия" вингери Гонсало Гедеш "Вулверхэмптон" футболчисига айланди. "Бўрилар" 25 ёшли португалиялик ярим ҳимоячи учун 32,6 миллион евро тўлаган.
Энди Гедешдан “қуруқ” қолган "Арсенал" эътиборини "Вулверхэмптон"нинг 22 ёшли вингери Педру Нетога қаратишга тайёр. Нуфузли инсайдер Девид Орнштейннинг сўзларига кўра, "канонирлар" трансфер ойнаси ёпилгунига қадар ҳужумкор ярим ҳимоячи билан шартнома имзоламоқчи.
Вернер расман Лейпцигга қайтди
Битим суммаси 20 миллион еврони ташкил қилади. Яна 10 миллион "Челси" бонуслар олиши мумкин.
"Лилль"дан Онана ва “Вулверхэмтон" сардори "Эвертон"га ўтишди
20 ёшли ярим ҳимоячи Амаду Онана "Лилль"дан "Эвертон"га кўчиб ўтди ва "тоффеес" билан 5 йиллик шартнома имзолади. SKY sports хабарига кўра, трансфер 33,5 миллион фунтни ташкил қилган.
Шунингдек, “Эвертон” “Вулверхэмптон” сардори, 29 ёшли ҳимоячи Конор Коудини бир мавсумга ижарага олди.
Симеоненинг ўғли “Наполи”да!
"Верона" ҳужумчиси Жованни Симеоне "Наполи" таркибида ижара асосида тўп суради, дея хабар беради инсайдер Фабрицио Романо. Аурелио Де Лаурентиснинг клуби ижара учун тахминан 3,5 миллион евро тўлайди, сотиб олиш опсияси эса 12 миллион.
"Атлетико" бош мураббийи Диего Симеоненинг ўғли Жованни Симеоне ўтган мавсумда А Серияда 17 та гол урди ва "Рома" аъзоси Темми Абраҳам билан тўпурарлар рўйхатида тўртинчи ўринни эгаллади.
