"Челси"нинг янги аъзоси Калиду Кулибали "Эвертон"га қарши Англия Премьер-лигасидаги илк ўйини ҳақидаги таассуротлари билан ўртоқлашди.
Эслатиб ўтамиз, футболчи мавсумнинг биринчи турида асосий таркибда майдонга тушганди, бироқ ўйиннинг 72-дақиқасида оёғининг пайлари тортишиб қолганлиги туфайли алмаштирилганди.
"Мен ўйинни интиқлик билан кутгандим, лекин бу қийин бўлишини билардим. АПЛ ритмига кўникишим керак. Биринчи ўйинда мен максимал даражада ўйнашга ҳаракат қилдим, энди эса давомини кутяпман” - деди Кулибали "Челси" расмий сайтига берган интервьюсида.
Эслатиб ўтамиз, Кулибали "Челси"га 38 миллион еврога тушган эди. Аввалроқ футболчига “Барселона” ҳам даъвогарлик қилганди, аммо якунда Калиду "Стэмфорд Бридж"га кўчиб ўтишни афзал билди.
