Хорватия терма жамоаси дарвозабони Стипе Плетикоса ўз терма жамоаси билан ЕВРО мусобақаларидан чиқиб кетганига изоҳ берар экан, бунга ўйинни бошқариб борган ҳакамларнинг "ҳиссаси" катта бўлганини таъкидлади.
Хорватиялик дарвозабон Испания термасига қарши ўйинни бошқариб борган германиялик Вольфганг Штарк бошчилигидаги ҳакамлар бригадасини қаттиқ танқид остигаа олди.
"Бугун ҳакамларнинг ғайритабиий қарорлари бўлмаганида биз испанларни ютишимиз ҳам мумкин эди. Аммо уларнинг қарорлари туфайли бугун биз азият чекдик. Бир вазиятда испанлар дарвозаси томон яққол пенальти белгиланмади, бизнинг дарвозамизга киритилган гол эса яққол оффсайд эди.
"Биз бугун дунёнинг энг кучли терма жамоасига қарши майдонга тушдик. Ўйлашимча айнан Испания ЕВРОни ютишга асосий даъвогардир. Аммо биз уларга қарши бугун муносиб тарзда ўйнадик. Ўйин оҳирида бироз чарчаб қолдик, рақибларда эса бироз имкониятлар пайдо бўла бошлади. Шундай бўлсада, жамоадошларимнинг кўзлари чақнаётганини ва интилишларини кўриб, бугун мағлубиятга учрамаслигимизга ишонаётган эдим."
"Ҳакамлар гол бўлган вазиятда оффсайдни кўрмай қолишди. Бу гол эса ўйин тақдирини ҳал қилди. Начора бу футбол, футболда бунақа ҳолатлар бўлиб туради", дея хорватиялик дарвозабоннинг ўйиндан кейинги интервьюсидан парча келтирмоқда championat.com сайти.
