Мадриднинг “Атлетико” клуби ҳужумчиси Альваро Мората Испания чемпионатининг 1-турида “Хетафе”га (3:0) қарши ўйиндан сўнг, клубда қолишни истаётганини айтди. Олдинроқ испаниялик ҳужумчи "Манчестер Юнайтед"га ўтиши мумкинлиги ҳақида хабарлар тарқалган эди.
"Мен бу ерда ўйнашни ва "Атлетико" учун кўплаб мусобақаларда иштирок этишни жуда хоҳлайман. Ҳар доимгидек бу ерда эканлигимдан хурсандман. Мен ишлашда давом эта оламан ва ҳар бир ўйинда жамоага натижа келтиришга ҳаракат қиламан. "Атлетико" дунёнинг энг яхши клубларидан бири. Ҳа, трансфер таклифлари бор, мен бу борада ҳеч нарса қила олмайман, фақат ишлашда давом этаман. Мен бу ерда бахтлиман ва ўйнашни давом эттирмоқчиман", - дея Мората сўзларини келтиради Marca.
"Хетафе" билан ўйинда 29 ёшли ҳужумчи дубль қайд этди. Мората сўнгги икки мавсумни "Ювентус"да ижара асосида ўтказди. Ҳужумчи А Серияда 67 та учрашувда 20 та гол урди ва 16 та голли узатмани амалга оширди. Унинг "матрасчилар" билан шартномаси 2023 йилнинг 30 июнига қадар тузилган.
