Аргентинанинг “Бока Хуниорс” клуби футболчилари ўртасида жиддий можаро юзага келди. Мамлакат чемпионати доирасида “Расинг” жамоасига қарши ўйиннинг танаффус вақтида ҳужумчи Дарио Бенедетто ва ҳимоячи Карлос Замбрано ўртасида муштлашув келиб чиқди. Учрашувнинг иккинчи бўлимида футболчилар юзлари кўкарган ҳолда майдонга тушишди.

Клуб содир бўлган воқеага аллақачон муносабат билдирган. Замбрано ва Бенедетто жамоанинг бўлажак ўйинларидан четлаштирилгани маълум бўлди. Улар "Росарио Сентрал" ва "Дефенса ва Хустисия" жамоаларига қарши бўлиб ўтадиган ўйинда майдонга тушишмайди. Ҳозирча интизомни бузганларга нисбатан молиявий жазолари ҳақида ҳеч қандай маълумот берилмаган.