АГМК клуби бош мураббийи Миржалол Қосимов "Насаф"га қарши бўлиб ўтган Суперлиганинг 16-тур баҳси (0:0) борасида ўз фикрини билдириб ўтди.

— Бу ҳар икки жамоа учун жуда ҳам муҳим ўйин эди. Икки жамоа ҳам фақат ғалаба умидида майдонга чиққанди. Аммо дуранг қайд этилди. Ўйлашимча, иккала бўлим ҳам жанговар тарзда кечди. Бугун "Насаф" ҳам ғалаба қозониши мумкин эди, бизда ҳам имкониятлар бўлди. Бундай ўйинларда футбол ютади.

— АГМК чемпионлик учун курашиши кутилаётганди, сўнгги ўйинларда жамоа кўп очко йўқотди. Бунинг сабаби нимада?
— Гапирсам баҳонага ўхшаб қолади. Баъзи ўйинларда бизга қизил карточка панд берди. Чемпионатининг илк ўйини, кейин "Олимпик", яқинда "Металлург"га қарши баҳсларда бир ўйинчимиз майдондан четлатилди. Мана шу учрашувларда максимал натижага эришганимизда очколаримиз ҳозир 9тага кўпроқ бўларди. Баъзи учрашувларда эса сўнгги дақиқаларда гол ўтказиб, ғалабани қўлдан чиқардик. Аммо булар баҳона бўлиш керак эмас. Бу футболнинг бир қисми. Ҳали ҳаммаси олдинда. Очколарни кузда санаймиз.

— Жорий мавсумда қайси жамоа чемпионликни қўлга киритади, деб ўйлайсиз?
— Бундай башоратларни қилишни ёқтирмайман. Мавсум якунланганидан сўнг айтишим мумкин.

— Пенальти бекор қилингани борасида фикрингиз?
— Ўзи пенальти йўқ эди-да! Бош ҳакам 5 метр масофадан кўриб, пенальти йўқлигига ишора қилмоқда. Бурчакка яқин жойдаги ёрдамчи ҳакам эса қандай қилиб пенальтини кўрди, ҳайронман.