17 июль куни Малайзия пойтахти Куала-Лумпур шаҳрида Осиё футбол конфедерациясининг профессионал футболни ривожлантириш кенгаши иштирокида навбатдаги йиғилиш бўлиб ўтади. Қайд этиш керак, бу жорий йил ҳисобидан ОФК кенгашининг тўртинчи йиғилишидир.
Йиғилиш давомида Осиё чемпионлар лигаси мусобақасини янада ривожлантириш, клубларни лицензиялаштириш ва Осиёда футболни профессионал мақомга чиқариш масалалари кўриб чиқилади.
Йиғилишда Ўзбекистондан доимгидек уч нафар вакил иштирок этади. Ўзбекистон футбол федерацияси президенти Мираброр Усмонов миллий ассоциациялар қўмитаси вакили сифатида Малайзияга ташриф буюрса, ПФЛ бош директори Фарход Магомедов профессионал футбол лигалари қўмитаси мажлисида иштирок этади. Шунингдек «Пахтакор» клуби вице-президенти Самвель Бабаян профессионал клублар қўмитаси йиғилишида қатнашади.
