Хорватия терма жамоаси сардори Дарио Срна Испания билан бўлиб ўтган ўйин ҳақида фикр билдирар экан, ўйинни бошқариб борган ҳакамларни ҳам эслашни унутмади.
"Биз бошқа жамоаларга Испанияга қарши қандай ўйнаш кераклигини кўрсатиб бердик. Бироқ биз ҳакамларни унутиб қўйган эканмиз. Агар Испания Европа чемпиони бўлишни ҳоҳласа, ўйин услубини ўзгартириши лозим. Улар биз ва Италия билан бўлган ўйинларда анча қийналишди. Биз Испания билан ўйинда улардан анча яхшироқ ўйнадик, бироқ ҳакам бизнинг фойдамизга иккита пенальти қўйиб бермади. Бу биз учун қийин вазият бўлди" дейди the Daily Star нашрига берган интервьюсида.
"Гарчи биз сўнгги йилларда Европанинг энг яхши ўнта жамоаси орасида бўлсак-да, ҳакамлар бизни ҳурмат қилмади. Агар ўша вазият Испания билан бўлганида, уларга пенальти қўйиб беришарди. Бу Испания билан бўладиган ўйинларда кичкина давлатларнинг муаммоси."
Футболчи Испания билан бўладиган ўйинлардан аввал бошқа жамоаларга маслаҳат бериб шундай деди: "Бошқа жамолар Испанияни мағлубиятга учратиши учун нима қлиши керак, билмайман. Балки, улар ҳакамларни алмаштириши керакдир."
