"Манчестер Юнайтед" ярим ҳимоячиси Скотт Мактоминайга Англия Премьер-лигасининг икки клуби даъвогарлик қилмоқда. Бу ҳақда 90min портали хабар бермоқда.
Манбага кўра, 25 ёшли шотландиялик ярим ҳимоячи учун Лондоннинг "Вест Хэм" ва "Ньюкасл" клублари курашади. Клублар Каземиронинг "Олд Траффорд"га ўтишидан кейин фаоллашди. Уларнинг фикрича, энди Мактоминай "қизил иблислар" таркибида камдан-кам майдонга тушади.
2021/2022-йилги мавсумда ярим ҳимоячи “Манчестер Юнайтед” сафида барча мусобақаларда 37 та ўйин ўтказиб, 2 та гол урди ва 1 та голли узатмани амалга оширди. Скоттнинг бозор қиймати 32 миллион еврога баҳоланмоқда.
