Испания терма жамоаси аъзоси Хави Мартинез Франция билан бўладиган баҳс ҳақида ўз фикрларини билдириб ўтди.
"Жамоадаги муҳит аъло даражада. Биз ўзимизга ишонмоқдамиз. Гуруҳ баҳсларида бизда осон бўлмаслигини билган эдик" дейди футболчи ўйиндан аввалги матубот анжуманида.
"2008 йилги Европа чемпионати ва 2010 йилги жаҳон чемпионатида ғолиб бўлганимиздан сўнг ҳамма нарса биз учун қийин бўлмоқда. Барча жамоалар бизни мағлуб этишни ҳоҳлайди."
"Гарчи гуруҳда мураккабликлар юзага келган бўлса-да, биз ҳозир яхши кайфиятдамиз ва қийин ўйинлардан сўнг қайта куч йиғиб олдик."
Франция терма жамоаси ҳақида фикр билдирар экан Хави Мартинез французларнинг тўпни кўпроқ назоратда ушлаб туришларини таъкидлаб ўтди.
"Ўйлашимча, кўпроқ тўпни назорат қилиб, тезкор ҳужумга ўтишади. Биз ҳимояда сергакроқ бўлишмиз шарт" дейди 23 ёшли футболчи. "Улардан тўпни олиб қўйишга ҳаракат қилишимиз лозим. Франциянинг вазияти худди бизникига ўхшаш: чунки, икки жамоа ҳам гуруҳнинг дастлабки икки баҳсида сўнгги ўйинга қараганда яхши ўйин кўрсатди. Ишончим комилки, французлар Швециядан учралган мағлубиятни унутиб, биз билан ўзгача кайфиятда майдонга тушадилар."
