“Нефтчи” – “Бунёдкор” учрашувидан сўнг матбуот анжумани бўлиб ўтди. Журналистлар саволларига жавоб бериш учун биринчи бўлиб Миржалол Қосимов анжуманлар залига кириб келди. Аслида матбуот-конференциясининг иккинчи қисми “Нефтчи” устози Юрий Саркисян билан ўтиши лозим эди. Бироқ фарғоналиклар устози негадир журналистлар билан мулоқотга келгани йўқ.

"Ҳар доим водийга қилган сафарларимиз оғир бўлади. Айниқса, “Нефтчи” билан ўйинларимиз қизиқарли ва шиддатли руҳда ўтиб келган. Умаман айтадиган бўлсам, Фарғонада бизга осон бўлмаган. Бу ерга “Бунёдкор” келадими, ОФК кубоги иштирокчисими ёки бошқа клубми ҳеч ким осон ўйин ўтказмаган. Фарғоналик мухлисларнинг далдаси “Нефтчи”нинг шижоатини янада ошириб туради. Айнан шу жиҳатларни шогирдларимга яхшилаб тушунтирган эдим".

"Биринчи бўлимни жуда яхши ўтказдик ва рақибни ўз ўйинимизга қарата олдик. Бироқ иккинчи 45 дақиқалик бошларида киритилган гол “Нефтчи”га қўшимча куч бағишлади. Жамоага жон кирди. Рақиб ҳам, биз ҳам яхши вазиятлардан фойдалана олмадик. Стандарт вазиятдан сўнг Иброхимов ўзини кўрсатди ва ғалаба тўпимизни киритди".

“Нефтчи” таркибида биронта ўйинчини алоҳида кўрсатиб ўтишни истамасдим. Бу жамоанинг ажойиб мураббийи ва шижоати юқори бўлган футболчилари бор. Агарда жамоанинг потенциали бўлмаганида Қаршида “Насаф”ни, Фарғонада “Пахтакор”ни юта олишмаган бўларди, - деди Миржалол Қосимов.