Ўзбекистон U-22 терма жамоаси бош мураббийи Алексей Евстафеев шогирдларининг Яманга қарши баҳсда кўрсатган ўйинидан қониқиш ҳосил қилмаганини таъкидлаб ўтди.

Яман ҳамда Ўзбекистон терма жамоалари ўртасидаги U-22 Осиё чемпионати саралаш “D” гуруҳи 4-тур учрашуви 1:1 ҳисобидаги дуранг натижа билан якунига етди. Дастлаб Яман терма жамоасининг ҳужум чизиғида тўп сурувчи ҳимоячиси – Саддам Ҳусайн ҳисобни очган бўлса, сўнгра Темурхўжа Абдухолиқов ҳисобни тенглаштирди.

«Бугунги ўйин биз учун жуда ҳам оғир бўлди. Шогирдларимнинг Яманга қарши учрашувда кўрсатган ўйинидан мутлақо қониқиш ҳосил қилмадим. Биз дам олмасдан кетма-кет тўртта ўйинда майдонга тушяпмиз, Яман эса кетма-кет уч кун дам олди. Шу жиҳат ҳам бугунги ўйинга ўз таъсирини кўрсатди», - деди Алексей Евстафеев.

«Бугунги дуранг натижадан сўнг Ўзбекистон терма жамоаси катта босим остида қолди, деб ўйламайман. Иордания терма жамоаси ҳақида яхши фикрдаман, бироқ биз бу ерга финал босқичи йўлланмасини қўлга киритиш учун келганмиз. Нима бўлишидан қатъий назар, биз сўнгги ўйинда фақат ғалаба учун майдонга тушамиз», - дея қўшимча қилди Ўзбекистон U-22 терма жамоаси бош мураббийи Алексей Евстафеев.

Эслатиб ўтамиз, Ўзбекистон терма жамоаси U-22 Осиё чемпионати саралаш “D” гуруҳидаги сўнгги учрашувни 22 июнь куни Иордания терма жамоасига қарши ўтказади.