"Ливерпуль" устози Европа Чемпионлар лигасининг янги мавсумга қуръа ташлаш маросими натижалари ҳақида фикр билдирди. Унинг жамоаси гуруҳ баҳсларини "Наполи", "Аякс" ҳамда "Рейнжерс"га қарши ўтказадиган бўлди. Шунга қарамай, немис мутахассиси қуръа натижаларидан мамнун эканини ҳамда жамоаси жиддий синовдан ўтишини билдирди. Бундай олиб қараганда, ҳақиқатдан ҳам "Ливерпуль" учун ҳақиқий синов даври яқинлашмоқда.
Жамоанинг гуруҳдаги рақиблари Европада ўзига хос услубга эга клублардир. Хусусан, "Аякс" тўрт бора Европа кубогини ютган, "Наполи" эса ушбу мусобақада 2009-10 йилги мавсумдан бери доимий қатнашиб келмоқда. "Рейнжерс" сўнгги 15 мавсумда еврокубокларнинг 2 та финалида иштирок этган. Шу жиҳатдан олиб қараганда, Клопп мураккаб ўйинлар юз беришини яхши тушуниб турибди. Аммо у А гуруҳидаги "Ливерпуль" учун ижобий жиҳатларни айтиб ўтди. У шундай дейди:
"Энг аввало, гуруҳ баҳслари биз учун одилона машаққат тақдим этади. Бу эса жамоа ўсиши учун жуда муҳим нарса. Гуруҳдаги рақиблар сифатли футболчиларга эга. Айтиш мумкинки, ҳаммамизда кейинги босқич учун етарлича имкон бўлади. Биз ҳеч қачон имтиёз талаб қилмаганмиз ва бизга буни таклиф ҳам қилишмаган. ЕЧЛда, сиз осонликча гуруҳдан чиқишни ўйлашингиз нотўғри бўлади. Чунки турнир стандартлари ўта юқори. Бу мавсумнинг ўзига хос томонларидан бири бу гуруҳ баҳсларининг нисбатан қисқа муддат ичида ўтказилишидир. Шундай экан, биз нафақат кучли рақобатга, балки ўзгача тақвимга ҳам тайёр бўлишимиз лозим. Рақибларимиз ҳақида ортиқча маълумот йиғишга ҳожат йўқ. Негаки, уларни жуда яхши биламиз. Сўнгги йиллардаги "Аякс"га қарши машаққатли икки баҳс, "Наполи" билан дуранг, бизнинг эсимиздан чиққани йўқ. Мен бу баҳслардан янги-янги дарслар олишимиз мумкинлигини биламан. Ҳа, "Рейнжерс" нисбатан янгироқ рақиб бўлиши мумкин(дир). Аммо уларни ҳам яқин йиллар ичида кузатганмиз. Жамоа анча ўсганидан хабаримиз бор.
"Рейнжерс"нинг ЕЧЛ гуруҳ босқичига қай йўсинда чиқиб келганини кўрдик. Биз рақибларнинг айрим футболчиларини ҳам яхши таниймиз. Масалан, Райан Кент Шотландияда юқори даражага эришди. Бэн Девисни биламиз ва "Рейнжерс" у учун ҳали янги.
Нима бўлганда ҳам битта нарса аниқ – гуруҳдаги 6 та ўйин ўта қийин ва мураккаб кечади. Мен бундан хурсандман. Чунки, ҳар қаерда футболчилар учун рақобат муҳити бўлгани яхши. Гуруҳимиз менга жуда маъқул келди".
ИСМАТОВ Ж.
