Футбол ажиб ўйин-да ўзи. У ҳар сафар бир гуруҳ одамларга қувонч улашиш баробарида бошқаларни ғам уммонига улоқтиради.
Ҳа, миллион ўйинида мағлубият дилларни хуфтон қилсада, ундан воз кечиш иложсиз. Футбол олами шунингдек, ҳеч ким кутмаган ижобий воқеликларни ҳам тақдим этиб туради тез-тез...
Шундан қизиқарли воқеалардан бири ўтган ҳафта узоқ Чилида кузатилди. Мамлакат чемпионати иккинчи дивизионидан ўрин олган «Фернандес Виаль» ва «Универсидад де Конcепcьон» ўртасидаги ўйин. Ногаҳон трансляция чоғи эфирда ит кўринди. У майдонга югуриб тушди ва дарвоза ёнига бориб, туриб олди. Қарангки, бу жонивор олдинроқ йўқолган ва эгалари қидириб тополмаган эканлар. Хуллас, улар тўрт оёқли дўстларини телевизорда кўргач, дарҳол стадион ходимлари билан боғланишди ва уни олиб кетишди.
Ўйин натижаси ўз йўлига, унинг қувонч ва ғам улашиши ҳам бошқа масала. Асосийси, футбол баъзан ижтимоий масалаларда ҳам шундай фойдали бўлиши мумкин.
