Futbol ajib o‘yin-da o‘zi. U har safar bir guruh odamlarga quvonch ulashish barobarida boshqalarni g‘am ummoniga uloqtiradi.
Ha, million o‘yinida mag‘lubiyat dillarni xufton qilsada, undan voz kechish ilojsiz. Futbol olami shuningdek, hech kim kutmagan ijobiy voqeliklarni ham taqdim etib turadi tez-tez...
Shundan qiziqarli voqealardan biri o‘tgan hafta uzoq Chilida kuzatildi. Mamlakat chempionati ikkinchi divizionidan o‘rin olgan «Fernandes Vial» va «Universidad de Koncepcyon» o‘rtasidagi o‘yin. Nogahon translyasiya chog‘i efirda it ko‘rindi. U maydonga yugurib tushdi va darvoza yoniga borib, turib oldi. Qarangki, bu jonivor oldinroq yo‘qolgan va egalari qidirib topolmagan ekanlar. Xullas, ular to‘rt oyoqli do‘stlarini televizorda ko‘rgach, darhol stadion xodimlari bilan bog‘lanishdi va uni olib ketishdi.
O‘yin natijasi o‘z yo‘liga, uning quvonch va g‘am ulashishi ham boshqa masala. Asosiysi, futbol ba’zan ijtimoiy masalalarda ham shunday foydali bo‘lishi mumkin.
