Буюк Британияда чоп этиладиган The Guardian нашрининг 21 июндаги сонида берилган рекламалардан бири антиқа сурат билан мухлислар эътиборини тортди.

Гап шундаки, Specsavers кўзойнаклар маркази рекламасида Европа чемпионатининг Украина – Англия терма жамоалари учрашувида Марко Девичнинг ҳакам томонидан ҳисобга олинмаган голи фотосурати жой олган эди. Шунингдек, ушбу реклама The New York Times газетаси саҳифаларида ҳам пайдо бўлган. Бу ҳақда “Украинская правда” нашри хабар тарқатмоқда.

Рекламага украин тилида шундай ёзилган эди: “Вам треба було пiти до Specsavers (as they say in Ukraine)”. Бу эса “Сиз Specsaversга боришингиз керак эди (Украинада шундай дейишади)” деган маънони англатарди. Суратда Девич томонидан берилган зарбадан сўнг тўп дарвоза чизиғини кесиб ўтгани ва уни Жон Терри тепаётган ҳолати акс этган. Ёдингизда бўлса, ўша вазиятда Виктор Кашшаи киритилган голни ҳисобламаган ва кейинчалик ўз хатосини тан олган ва узр сўрашни ҳам канда қилмаганди.

Бу нарса Евро-2012га алоқадор рекламаларнинг биринчиси эмас. Бунгача даниялик Никлас Бендтнер Дания – Португалия ўйинида Ирландиянинг Paddy Power букмекерлик идорасини ўз кийимида реклама қилганди. УЕФА Бендтнернинг антиқа қилиғи учун 100 минг евро миқдорида жаримага тортганди. Кейинчалик футболчига белгиланган жаримани Paddy Power тўлашини маълум қилган.