«Ювентус» ярим ҳимоячиси Пол Погбанинг оилавий можаролари борасида янги тафсилотлар маълум бўлди.

Маълум бўлишича, футболчининг акаси Матиас Погба шантаж йўли билан ундан 13 миллион еврога яқин пул ундирмоқчи.

Бир неча кун аввал Матиас ижтимоий тармоқда видео мурожаат қолдирган. Унда Матиас Пол Погба, унинг агенти Рафаэл Пименти ва Килиан Мбаппега оид катта шов-шувларга сабаб бўладиган видео борлигини маълум қилган.

Прокуратура «уюшган гуруҳ томонидан шантаж қилишга уриниш» бўйича иш қўзғаган. Get French Football News нашри хабарига кўра, 29 ёшли футболчини жорий йилнинг март ойида болаликдаги дўстлари ва икки нафар қуролланган шахс Париждаги уйга алдов йўли билан чақирган ва Полдан 13 миллион евро талаб қилган. Талончилар Погбага у профессионал футбол фаолиятини бошлагандан буён уларга ёрдам беришни тўхтатганини айтган.

Погбадан «кўрсатилган хизматлар» учун пул талаб қилинган — гўёки улар Полни 13 йил давомида яширинча қўриқлаб келган. «Ювентус» футболчисининг таъкидлашича, бундан кейин у акаси Матиас ва болаликдаги дўстлари томонидан таҳдидга учрай бошлаган.

Французнинг қўшимча қилишича, Париждаги воқеадан сўнг у товламачиларни яна бир неча бор, шу жумладан, 2022 йилнинг июль ойида Туриндаги «Ювентус» базасида ҳам кўрган. Ўшанда акаси Матиас ҳам ушбу гуруҳга киришини билиб қолган. Пол «кекса синьора» юристига мурожаат қилган, у эса ишни полицияга оширган.

Погба полиция ходимига доимо болаликдаги дўстларига ёрдам бериб келганини, январь ойида дўстларидан бирини банк картасидан 200 минг евро ўғирлаганликда айблаб, Манчестердаги уйидан ҳайдаб чиқаришга мажбур бўлганини айтиб берган.

Тергов натижалари Мбаппе ушбу воқеага товламачиларнинг Погба ҳақидаги тарқатган маълумотлари сабаб қўшилиб қолганини кўрсатади. Гўёки «Ювентус» хавбеки шамандан Килианни афсун қилиб қўйишини сўраган. Футболчининг ўзи бу айбловни рад этган.